Rapport frå inspeksjon ved SIM Heiane miljøsentral og omlastehall Kontrollnummer: 2018.048.I.FMHO Kontaktpersonar ved inspeksjonen:

(1)

Fylkesmannen i Hordaland

SUNNHORDLAND INTERKOMMUNALE MILJØVERK IKS Bergen, 12.04.2018

Svartasmåget 5419 Fitjar

Sendt på epost til sim@sim.as

Dykkar ref.: Vår ref.(oppgi ved svar):

2015/3613 Sakshandsamar:

Astrid Holte

Rapport frå inspeksjon ved SIM Heiane miljøsentral og omlastehall

Kontrollnummer: 2018.048.I.FMHO

Kontaktpersonar ved inspeksjonen:

Frå verksemda:

Olaf Skram

Frå Fylkesmannen i Hordaland:

Astrid Holte og Silje Tingstad

Resultat frå inspeksjonen

Denne rapporten gjeld resultatet frå inspeksjon ved SIM Heiane miljøsentral den 08.03.2018. Rapporten er å sjå på som endeleg dersom vi ikkje får tilbakemelding om faktiske feil innan to veker etter at rapporten er motteken.

Fylkesmannen i Hordaland avdekka 3 avvik under inspeksjonen innan følgjande tema:

 Farleg avfall

 Internkontroll

Vi gav også 1 merknad. Avvik og merknader er nærare omtalte frå side 4 og utover i rapporten.

Oppfølginga etter inspeksjonen er nærare omtalt på side 3.

Elektronisk dokumentert godkjenning, utan underskrift

Astrid Holte Hallvard Hageberg

senioringeniør senioringeniør

Kopi til: Stord kommune

(2)

1. Informasjon om den kontrollerte verksemda

Ansvarleg eining

Namn: SUNNHORDLAND INTERKOMMUNALE MILJØVERK IKS HEIANE MILJØSENTRAL STORD

Organisasjonsnr.: 913090713 Eigd av: 958284837

Bransjenr. (NACE-kode): 38.110 - Innsamling av ikke-farlig avfall

Kontrollert anlegg

Namn: SIM Heiane miljøsentral (forskriftsregulert) Anleggsnr.: 1221.0096.02

Kommune: Stord Fylke: Hordaland

Anleggsaktivitet: Farlig avfall – mottak og mellomlagring

Løyve gitt: Regulert av forskrift Sist endra: -

Kontrollert anlegg

Namn: SIM Heiane Omlastehall (med løyve) - Mottak farleg avfall

Anleggsnr.: 1221.0096.03

Kommune: Stord Fylke: Hordaland

Anleggsaktivitet: Farlig avfall – mottak og mellomlagring

Løyve gitt: 29.04.2014 Sist endra: 19.09.2017

2. Bakgrunn for inspeksjonen

Inspeksjonen vart gjennomført for å kontrollere om gjeldande krav som er fastsette i eller med heimel i forureiningslova, vert overhaldne. Inspeksjonen inngår i Fylkesmannen sin aksjon for Mottak og mellomlagring av farleg avfall 2018. Aksjonen er landsdekkande.

Tilsynet vart gjennomført med heimel i forureiningslova § 48.

Inspeksjonstema

 Farleg avfall: mottakskontroll, journalføring, handtering, lagring, vidarelevering, finansiell sikring

 Utsleppskontroll

 Internkontroll: avvikssystem, risikovurdering, beredskap

På miljøsentralen vart det ført tilsyn med alle tema. I omlastehallen vart det berre ført tilsyn med deklarasjonar og journalføring. Rapporten gjeld avvik og merknader som vart avdekka under inspeksjonen. Han gir ingen fullstendig tilstandsvurdering av miljøarbeidet eller miljøstatusen til verksemda.

Definisjonar

Avvik: Manglande etterleving av krav fastsette i eller med heimel i lov.

Merknad: Eit tilhøve som tilsynsetatane meiner det er naudsynt å peike på for å ivareta ytre miljø, men som ikkje er omfatta av definisjonen for avvik.

(3)

Andre tilhøve: Saker som kom fram under inspeksjonen og som det kan vere nyttig for verksemda og sakshandsamarar å kjenne til. Informasjon om verksemda og

kommentarar til tema som vart tekne opp under inspeksjonen, men som ikkje vart klassifisert som avvik eller merknader, kan også inngå her.

3. Oppfølging etter inspeksjonen

Sunnhordland Interkommunale Miljøverk IKS Heiane Miljøsentral pliktar å rette opp avvika som er omtalte i denne rapporten så snart som råd. For at Fylkesmannen skal kunne avslutte saka, ber vi om at verksemda innan 15.06.2018 sender ei skriftleg utgreiing som viser korleis avvik er retta og kva tiltak som er gjennomførte eller planlagde.

4. Vedtak om gebyr

Vi viser til informasjon og varsel om gebyrplikt som vart gitt til verksemda den 08.03.2018. Verksemder skal betale gebyr for kontrollar utførte av Fylkesmannen i samsvar med § 39-3 i forureiningsforskrifta. Gebyret skal dekke kostnader med førebuing, gjennomføring og oppfølging av kontrollen. Gebyrsatsar for kontroll av

verksemder utan løyve etter forureiningslova er fastsette i forureiningsforskrifta §§ 39-7 og 39-8.

På bakgrunn av forventa ressursbruk må Sunnhordland Interkommunale Miljøverk IKS Heiane Miljøsentral betale eit gebyr på kr 17 200,- for inspeksjonen, jf.

forureiningsforskrifta §§ 39-7 og 39-8. Dette svarer til gebyrsats 3 for tilsyn av inntil ein dags varigheit. Miljødirektoratet vil sende dykk ein faktura for innbetaling til statskassa. Fylkesmannen viser elles til forureiningsforskrifta kapittel 39 om innkrevjing av gebyr til statskassa.

Klagerett

Vedtaket om gebyr kan klagast på til Miljødirektoratet, jf. § 28 i forvaltningslova. Ein eventuell klage bør vere skriftleg grunngjeven og adressert til Miljødirektoratet, men han skal sendast via Fylkesmannen i Hordaland. Fylkesmannen vil vurdere endring av

vedtaket eller sende saka vidare til Miljødirektoratet for endeleg vedtak. Gebyret som er fastsett ovanfor, må likevel betalast inn. Dersom Miljødirektoratet tek klagen til følgje, vil for mykje innbetalt beløp bli refundert.

5. Offentlegheit i forvaltninga

Denne rapporten vil vere offentleg tilgjengeleg via postjournalen til Fylkesmannen i Hordaland (jf. offentleglova).

(4)

6. Avvik

Vi fann følgjande avvik under inspeksjonen:

Avvik1

Verksemda tek imot meir enn 1500 kg farleg avfall per kunde per år på miljøsentralen Avvik frå:

Avfallsforskrifta § 11-7 punkt c om unntak frå krav om løyve for kommunale mottak Kommentarar:

Unntak frå krav om løyve for kommunale mottak

Kommunale mottak for farleg avfall som driv etter vedlegg 3 kan ta imot inntil 1500 kg farleg avfall pr. år pr. verksemd.

Avviket er basert på følgjande observasjonar:

Avfallsdeklarering.no viser at miljøsentralen har tatt imot over 1500 kg per år per verksemd frå dei andre miljøstasjonane i SIM. Det gjeld avfall med EAL-kode 170903 og 200137.

Avvik 2

Deklarasjon og journalføring har manglar Avvik frå:

 Avfallsforskrifta vedlegg 3 punkt 8 om deklarering og punkt 9 om journalføring

 Løyve til drift av avfallsanlegg for SIM Heiane Miljøsentral punkt 4.1 om deklarasjon og punkt 4.2 om journalføring

Kommentar til regelverket:

Krav etter avfallsforskrifta (gjeld farleg avfall på miljøsentralen) Deklarasjon

Ved mottak av farleg avfall frå verksemder skal det kommunale mottaket sjå til at avfallet er deklarert. Kommunen (eller avfallsselskapet) skal deklarere farleg avfall frå hushald. Avfallet skal vere deklarert seinast i det avfallet forlèt det kommunale mottaket.

Journalføring

På kommunale mottak for farleg avfall er det krav om journal med alle nødvendige opplysningar om farleg avfall, som mengde, type, deklarasjonsnummer, opphav m.v.

Journal er særleg viktig for å dokumentere vidarelevering av farleg avfall frå verksemder, då avfallsdeklarering.no berre dokumenterer levering/mottak til 1. ledd. Det er òg viktig for å ha oversikt over avfall på lager.

Krav i løyvet (gjeld trykkimpregnert trevirke i omlastehallen) Deklarasjon

Verksemda skal ha eit system som sikrar at motteke impregnert trevirke er deklarert.

Journalføring

Verksemda skal føre journal med alle nødvendige opplysningar om det farlege

avfallet, som mengde, type, deklarasjonsnummer, opphav med vidare. Journal er særleg viktig for å dokumentere mottak etter 1. ledd og vidarelevering av avfallet, då

(5)

avfallsdeklarering.no berre dokumenterer levering/mottak til 1. ledd. Det er òg viktig for å ha oversikt over avfall på lager.

Miljøsentralen

Deklarasjon og journalføring

 Impregnert trevirke forlèt miljøsentralen utan at det er deklarert. Impregnert trevirke blir deklarert kvartalsvis til omlastehallen, sjølv om det blir levert fleire lass i dei tre månadene. Vekta på kvart lass blir påført deklarasjonen.

 Miljøsentralen førte ikkje journal over vidarelevering av farleg avfall frå verksemder.

Det var få deklarasjonar frå verksemder. Miljøsentralen tar kopi av deklarasjonar som er levert vidare og fører på kvar deklarasjon kor avfallet er levert vidare.

 Miljøsentralen tok imot PCB-haldige isolerglasruter frå SIM Svartasmoget og Ragn Sells AS avd. Sunnhordland utan at dei var deklarerte til SIM Heiane Miljøstasjon. Det vart opplyst at rutene vart mellomlagra inne på miljøsentralen i opptil ein månad i påvente av at Norsk Gjenvinning henta dei. Rutene vart deklarerte direkte til Norsk Gjenvinning. Miljøsentralen førte heller ikkje journal over mottak, mellomlagring og vidarelevering av rutene.

Omlastehallen

Deklarasjon og journalføring

 Omlastehallen tok imot impregnert trevirke frå miljøstasjonane i SIM utan at det var deklarert. Dette farlege avfallet vart deklarert kvartalsvis, sjølv om dei tok imot flerie lass innanfor dei tre månadene. Vekta på kvart lass vart ført på deklarasjonen.

 Journal for trykkimpregnert avfall inn til og ut frå omlastehallen har manglar. Det er opplyst at avfallet vert registrert på vekt, og at dette fungerer som journal.

Vektjournalen har ikkje informasjon om mellom anna deklarasjonsnummer for avfall inn til og ut frå anlegget, og er derfor ikkje i tråd med kravet til kva informasjon ein journal skal innehalde. Det vart opplyst at avfallet vart levert vidare til Geminor, som har eksportløyve frå Miljødirektoratet.

Avvik 3

Internkontrollen for miljøstasjonen har manglar Avvik frå:

 Internkontrollforskrifta § 5 punkt 6 om risiko, 7 om rutinar og 8 om oppdatering.

Kommentar til regelverket:

Internkontrollforskrifta Miljørisikovurdering

Verksemda skal kartleggje farar og problem og på denne bakgrunn vurdere risiko, og utarbeide tilhøyrande planar og tiltak for å redusere risikotilhøva.

Rutinar

Verksemda skal ha rutinar for å avdekke, rette opp og forebyggje brot fastsett i eller i medhald av lov eller forskrift.

Oppdatering

Verksemder som har internkontroll skal sjå til at internkontrollen vert overvaka og gått gjennom for å sikra at den fungerer slik den skal.

(6)

Miljørisikovurdering

Risikovurderinga omfatta ikkje vurdering av fare for forureining til avløpsnett frå lager for farleg avfall på miljøsentralen. Det var ikkje vurdert om dei risikoreduserande tiltaka var tilstrekkeleg for å stette kravet i avfallsforskrifta kapittel 11 vedlegg 3 punkt 6.2 om sikring mot forureining

 Evt. søl og spill frå lagerområde for farleg avfall inne på miljøsentralen har

avrenning til sluk/renne utanfor hallen, men vurdering av risiko og tiltak var ikkje omtalt i risikovurderinga. Området var under tak og hadde tett dekke. Det var sett i verk fleire risikoreduserande tiltak som lagring i IBC, oppsamlingskar m.v.

 Impregnert trevirke var lagra i open container på miljøsentralen men vurdering av risiko og tiltak var ikkje omtalt i risikovurderinga. Fleire andre avfallstypar som ikkje var farleg avfall var lagra i containarar med lokk.

Rutinar

 Det var rutine for basiskarakterisering og deklarasjon av farleg avfall før levering til deponi, men rutinen var ikkje følgt ved levering av sandfangsmassar frå oljeutskillar. Slikt avfall var levert til Svartasmoget utan deklarasjon eller

basiskarakterisering. Det var planlagt å lage basiskarakterisering og deklarasjon, men dette var ikkje gjort ved tilsynet.

 Det var registrert eit avvik innan yte miljø på miljøsentralen i 2017 og ingen avvik i 2018. Dette kan tyde på at avvikssystemet fungerer dårleg. I omlastehallen var det registrert mange avvik.

Oppdatering

 Internkontrollperm med rutinar, beredskapsplan og varslingsplan var ikkje oppdatert sidan 2014. Blant anna inneheldt varslingsplanen namn på personar som hadde slutta. Internkontrollen var også nettbasert, men det var vanskeleg for dei ansvarlege på stasjonen å finne fram i denne løysninga. Dei kunne derfor ikkje opplyse om rutinar, risikovurdering m.v. var oppdatert etter 2014.

7. Merknader

Vi ga følgjande merknader under inspeksjonen:

Merknad 1:

Bruk av avfallsdeklarering.no kan bli betre Kommentar:

Avfallsdeklarering.no vart brukt som journal for farleg avfall frå hushald på

miljøsentralen. Ved mottak av ny type farleg avfall frå hushald vart det oppretta ein ny deklarasjon i avfallsdeklarering.no. Avfallsmengda vart oppdatert kvar gong den vart vesentleg endra, og uansett om lag kvar veke. Det var vanskeleg å halde oversikt over avfall på lager da det ikkje er mogleg å ta ut rapportar i avfallsdeklarering for uferdige deklarasjonar og det vart derfor i tillegg ført ein eigen lagerjournal.

Det var ein del verksemder som hadde deklarert farleg avfall til miljøsentralen, men avfallet var ikkje levert hit. Deklarasjonane var gamle, men var ikkje avvist. Verksemda må sjekke opp i deklarasjonar som ikkje vert motteke, og avvise desse fortløpande.

(7)

Dersom avfallsdeklarering skal brukast som journal for farleg avfall frå hushald må den oppdaterast jamleg, feil må rettast opp fortløpande, og brukarane må ha god kunnskap om dei ulike funksjonane og brukarane i avfallsdeklarering.no. Avfallsdeklarering kan ikkje brukast som journal for farleg avfall frå verksemder.

8. Andre tilhøve

Informasjon om handtering av vindauge som inneheld ftalater og asbest Vindauge som ikkje er farleg avfall på grunn av innhald av PCB- eller klorparafin kan innehalde ftalater eller asbest (Thermopane-vindauge). Miljødirektoratet har i samband med aksjonen opplyst at dei på generelt grunnlag ikkje har tatt stilling til om desse vindauga er farleg avfall. Fugene vil ofte vere farleg avfall, men det er usikkert om heile vindauge er farleg avfall. Desse vindauga må likevel handterast forsvarleg. Dersom desse vindauga blir kasta i restavfallet vil vindauget knuse og det vil vere fare for at vindauget kjem over grenseverdien for farleg avfall. I tillegg kan eksponeringsfaren for asbest auke. Slike vindauge skal derfor ikkje kastast i restavfallet, men leverast heile.

Informasjon om lagring av EE-avfall

Lagring av EE-avfall var ikkje tema under aksjonen. Vi vil likevel understreke at EE-avfall inkludert kvitevarer skal lagrast forsvarleg. For dette avfallet vil lagring på fast dekke og skjerming for vêr og vind normalt vere nødvendig. Lagring av avfallet må risikovurderast Regulering av farleg avfall på miljøstasjonen etter forskrift eller løyve

Miljøstasjonen tar imot over 1500 kg per år per verksemd. Dette overskrid maksimal årleg grense farleg avfall eit kommunalt mottak kan ta imot per verksemd per år utan særskilt løyve. Fylkesmannen vil ta kontakt for å vurdere om miljøstasjonen bør regulerast i løyve i staden for etter forskrift.

9. Dokumentunderlag

Lovgrunnlaget for inspeksjonen var:

 Forureiningslova

 Avfallsforskrifta

 Internkontrollforskrifta

 Løyve til verksemd etter forureiningslova frå Fylkesmannen (gjeld omlastehallen)