SAKSFRAMLEGG
Sakshandsamar: Steinulf Skjerdal Arkiv: S11 &13
Arkivsaksnr.: 10/1698
Høyring av søknad med konsekvensutgreiing for Øyane kraftverk og Illvatn pumpekraftverk
Rådmannen si tilråding:
::: Sett inn innstillingen under denne linja
Luster kommunestyre sitt primære standpunkt om at utbyggingssøknadene for Øyane kraftverk og Illvatn pumpekraftverk bør sjåast i samanheng med og stillast i bero inntil det føreligg søknad om fornying av gjeldande konsesjonar for Fortun-vassdraget, er uendra. Først då vil ein kunna føreta ei samla vurdering av no omsøkte utbyggingar og tidlegare utbyggingar i tråd med naturmangfaldlova sin § 10.
Slik saka no stiller seg, vil kommunestyret likevel gje følgjande innspel til dei omsøkte utbyggingane:
1. Kommunestyret meiner at ekspropriasjonsspørsmålet i konsesjonssøknadene er utilstrekkeleg utgreidd, og at dette må underleggjast ny og grundigare handsaming.
2. På nærare spesifiserte vilkår, som minst oppfyller dei vilkår som vil vera aktuelle ved ny reguleringskonsesjon for vassdraget, vil Luster kommunestyre tilrå at det vert gjeve
konsesjon for utbygging av Illvatn pumpekraftverk. Kommunestyret ber om at det vert sett følgjande vilkår:
a. Av omsyn til landskapet og villreininteressene må 132 kV-linja leggjast i jordkabel på strekninga frå kraftstasjonen til ho kjem nedanfor Fivlemyrdammen.
b. Det same gjeld heile 22 kV-linja med uttak frå Illvatn pumpekraftverk for lokal forsyning til Fivlemyr kraftverk og Nørdstedalsseter, for å unngå to parallelle luftlinjer på strekninga.
c. Av omsyn til friluftslivet må det setjast krav om magasinfylling i Illvatnet i høgsesongen, 1. juli – 15. september.
3. Under føresetnad av at inntaket for kraftverket vert plassert nedanfor Spitarfossen, tilrår Luster kommunestyre at det vert gjeve konsesjon for Øyane kraftverk. Kommunestyret ber om at det vert sett følgjande vilkår:
a. Utbyggjar må påleggjast å tilretteleggja for at tunnelmassar vert gjort tilgjengeleg for seinare utnytting til vegbygging o.a, ev. transportera dei til tilvist deponi.
b. Alternativ 2 skal veljast som vegtilkomst til kraftverket. I fall alternativ 3 likevel skulle bli valt, må vegen leggjast heilt ut mot elva og kombinerast med elveforbygging, ikkje som skissert i søknaden at vegen delvis vert lagd på dyrka mark med ei stripe skog mellom vegen og elva.
c. Kraftlinja mellom kraftstasjonen og tilkoplingspunktet med eksisterande linje må gå på austsida av elva med best mogeleg tilpassing til kulturminna ved Sveinsøystølen.
d. Av omsyn til fiskeinteressene må utbyggjaren påleggjast å utplassera lakserogn i vassdraget ved nedgraving i elvegrusen.
e. Kraftverket må byggjast med omlaupsventil for å hindra stranding av yngel ved hurtig stopp.
f. Det må byggjast tersklar i elva mellom utlaupet av kraftverket og vandringshinder for anadrom fisk (hølen i Kleppasvoden).
4. Som felles vilkår for dei to utbyggingane tilrår kommunestyret:
a. Det må setjast krav om minstevassføring på 2 gonger alminneleg lågvassføring om sommaren og 1 gong alminneleg lågvassføring om vinteren i heile vassdraget nedanfor Fivlemyrdammen.
b. Opplagra massar som fører til skadeflaumar i vassdraget må fjernast.
c. Det må gjennomførast sikringstiltak mot Fortunselva ved Øyane, Øyene og Drægni for å hindra skadeflaumar.
d. Eksisterande veg frå Skagen til Øyane må rustast opp.
e. Luster kommune må få tilført eit næringsfond på 25 mill. kroner
f. Det må gjevast tilskot til opprusting, drift og vedlikehald av forsamlingslokale i Fortun.
5. For utfyllande grunngjeving av punkta ovanfor vert det synt til saksutgreiinga til k.sak nr.
7/11.
: : : Sett inn innstillingen over denne linja ... Sett inn saksutredningen under denne linja
Saksutgreiing:
Prenta vedlegg: Notat frå Sweco Norge AS datert 14.09.2012 om alternative inntaksstader for Øyane kraftverk
Brev frå Hydro til Luster kommune datert 09.05.2012 Saksdokument til k.sak nr. 7/11
Uprenta vedlegg:
Samandrag:
For å kunna føreta ei samla vurdering av omsøkte utbyggingar for Illvatn pumpekraftverk og Øyane kraftverk og tidlegare utbyggingar i Fortunsvassdraget i tråd med naturmangfaldlova sin § 10, har Luster kommunestyre tidlegare tilrådd at dei nye utbyggingssøknadene må stillast i bero inntil det føreligg søknad om fornying av gjeldande konsesjonar for vassdraget, jf. k.sak nr. 7/11.
NVE har ikkje imøtekome kommunestyret sitt krav om å stilla søknadene i bero og kjem til å gå detaljert inn i dei no og gje si tilråding til OED. Seinast under felles synfaring i
utbyggingsområdet 02.10.2012 gav NVE uttrykk for at dei ser det som sterkt ønskjeleg at Luster kommune uttalar seg konkret om søknadene som ligg føre og oppmoda kommunen om å sjå på saka ein gong til.
Etter at saka var oppe sist, er det kome til nokre nye moment. Mellom anna har Hydro engasjert konsulentselskapet Sweco Norge AS til å vurdera alternative inntak til Øyane kraftverk nedanfor Spitarfossen. Dessutan har Hydro igangsett planprosess for å synleggjera tiltak som bør gjennomførast for å ivareta fiskeinteressene i Fortunselva, samt å betra tilhøve knytt til flaumsituasjonar som følgje av opphoping av steinmassar i elvelaupet. Hydro har også bestemt seg for å starta arbeidet med søknaden om fornya reguleringskonsesjon for
Fortun/Grandfasta no, og har hatt møte med NVE om det.
Rådmannen tilrådde konsesjon for Illvatnet pumpekraftverk sist saka var oppe, men rådde ifrå konsesjon for Øyane kraftverk, det siste særleg på grunn av redusert landskapsoppleving
dersom Spitarfossen på det næraste vart borte. Med inntak nedanfor Spitarfossen meiner rådmannen ei utbygging kan godtakast og vil tilrå konsesjon også for Øyane kraftverk på nærare fastsette vilkår.
Utval som har vedtaksmynde:
Kommunestyret
Fakta:
I k.sak nr. 7/11 den 17.02.2011 gjorde kommunestyret følgjande vedtak i høyringssaka om omsøkte konsesjonar for utbygging av Illvatnet pumpekraftverk og Øyane kraftverk i Fortun:
«Luster kommunestyre sitt standpunkt er at utbyggingssøknadene for Øyane kraftverk og Illvatn pumpekraftverk må sjåast i samanheng med og stillast i bero inntil det føreligg søknad om fornying av gjeldande konsesjonar for Fortun-
vassdraget. Først då vil ein kunna føreta ei samla vurdering av no omsøkte utbyggingar og tidlegare utbyggingar i tråd med naturmangfaldlova sin § 10.»
NVE har ikkje imøtekome kommunestyret sitt krav om å leggja dei to konsesjonssøknadene til side i påvente av at det føreligg søknad om ny reguleringskonsesjon for heile vassdraget. NVE kjem difor til å gå detaljert inn i søknadene no og gje si tilråding til OED, etter planen
føresommaren 2013.
Den 02.10.2012 gjennomførde NVE synfaring i utbyggingsområdet saman med representantar frå ulike sektorinteresser, grunneigarar, offentlege organ m.v, der også Luster kommune var
representert. Under synfaringa gav NVE uttrykk for at dei ser det som sterkt ønskjeleg at Luster kommune uttalar seg konkret om søknadene som ligg føre og oppmoda kommunen om å sjå på saka på nytt.
Rådmannen syner til saksutgreiinga til k.sak 7/11 som i hovudsak framleis er relevant. Men i etterkant er det kome til nokre nye moment.
Mellom anna har Hydro engasjert konsulentselskapet Sweco Norge AS til å vurdera alternative inntak til Øyane kraftverk nedanfor Spitarfossen, jf. rapport datert 14.09.2012. I rapporten er følgjande alternativ vurdert:
1. Omsøkt alternativ ovanfor Spitarfossen, basisalternativet, (HRV. 577).
2. Inntak og dam på det flate partiet nedanfor Spitarfossen, (HRV 506).
3. Inntak og dam nedanfor det flate partiet i «Juvet», (HRV 432).
I oppsummeringa si uttalar Sweco at det knyter seg stor uvisse til damfundamentet sin tettleik for alternativ 2, samt drifts- og tilkomsttilhøva for begge alternativa nedanfor Spitarfossen, dvs. alternativ 2 og 3. Det vert konkludert med at det best eigna alternativet er det omsøkte, som gjev gode fundamenteringstilhøve og enkle drifts- og vedlikehaldstilhøve.
Sweco har stipulert kostnaden for alle tre inntaksalternativa og kome til at alternativ 1 vil kosta om lag 3,5 mill. kroner, alternativ 2 om lag 18,5 mill kroner og alternativ 3 om lag 8,8 mill. kroner.
Under synfaringa gav representantane frå Hydro uttrykk for at alternativ 3 uansett er uaktuelt og at dei også er usikre på om det vil bli bygging dersom dei vert pålagde å gå på alternativ 2.
Det må elles opplysast om at Hydro har igangsett prosess med utarbeiding av heilheitleg plan for å synleggjera tiltak som bør gjennomførast for å ivareta fiskeinteressene i Fortunselva, samt å betra tilhøve knytt til flaumsituasjonar som følgje av opphoping av steinmassar i elvelaupet.
Hydro har også bestemt seg for å starta arbeidet med søknaden om fornya
reguleringskonsesjon for Fortun/Grandfasta no, og har hatt møte med NVE om det.
Det vert framheva frå Hydro si side at dersom det skulle bli gjeve konsesjon for dei omsøkte nye kraftverka, betyr det mykje økonomisk for selskapet å koma i gang med anleggsarbeidet snarast. For å koma inn under sertifikatordninga for fornybar kraft, er det avgjerande å få driftsstart innan 2020. Jf. brev frå Hydro til Luster kommune datert 09.05.2012 med oppsummering etter møte med kommunen 28.03.2012.
Det må nemnast at grunneigarane i Øyane er sterkt imot at det vert gjeve konsesjon til Øyane kraftverk, uansett kva inntaksalternativ som vert valt og uansett kva avbøtande tiltak
utbyggjaren vert pålagd å gjennomføra.
Vurdering:
Då saka var oppe sist, tilrådde rådmannen at det vart innvilga konsesjon for bygging av Illvatnet pumpekraftverk på nærare spesifiserte vilkår. For denne utbygginga vil rådmannen leggja fram same tilråding som sist, men med ei endring om at kravet for minstevassføring bør gjelda strekninga nedanfor Fivlemyrdammen, ikkje frå Illvatnet som tilrådd. Grunnen til at rådmannen tilrår denne endringa er innspel om at ei ev. pålagd minstevassføring heilt frå Illvatnet vert vanskeleg å få til avdi minstevassføringa då må pumpast ut frå dammen så lenge denne er nedtappa.
For Øyane kraftverk rådde rådmannen ifrå å gje konsesjon. I saksutgreiinga tilkjennegav han likevel at med inntak nedanfor Spitarfossen, ville saka stilt seg annleis. Med bakgrunn i dette
er rådmannen komen til at han på nærare fastsette vilkår no kan tilrå konsesjon under føresetnad av at inntaksalternativ nedanfor Spitarfossen vert valt, dvs. alternativ 2.
Aktuelle vilkår og avbøtande tiltak i fall det skulle bli gjeve konsesjon til Øyane kraftverk, vart omtala i saksutgreiinga sist. Rådmannen vil tilrå kommunestyret å slutta seg til det som er nemnt der:
• Utbyggjar må påleggjast å tilretteleggja for at tunnelmassar skal kunna bli nytta seinare til vegbygging o.a, ev. bli transporterte til tilvist deponi.
• I tråd med grunneigarane sine ønskje vil kommunestyret tilrå at alternativ 2 vert valt som vegtilkomst til kraftverket. I fall alternativ 3 likevel skulle bli valt, må vegen leggjast heilt ut mot elva og kombinerast med elveforbygging, ikkje som skissert i søknaden at vegen delvis vert lagd på dyrka mark med ei stripe skog mellom vegen og elva.
• Kraftlinja mellom kraftstasjonen og tilkoplingspunktet med eksisterande linje må gå på austsida av elva med best mogeleg tilpassing til kulturminna ved Sveinsøystølen.
• Av omsyn til fiskeinteressene må utbyggjaren påleggjast å utplassera lakserogn i vassdraget ved nedgraving i elvegrusen.
• Kraftverket må byggjast med omlaupsventil for å hindra stranding av yngel ved hurtig stopp.
• Det må byggjast tersklar i elva mellom utlaupet av kraftverket og vandringshinder for anadrom fisk (hølen i Kleppasvoden).
Dato 11.10.2012
Jarle Skartun Steinulf Skjerdal
rådmann landbrukssjef
___________________________________________________________________________
Særutskrift skal sendast: NVE.Konsesjonsavdelinga, Postboks 5091 Majorstua, 0301 Oslo Over internett: www.nve.no/Vannkraft
m/kopi til: Norsk Hydro ASA, 0240 Oslo
Sogn og Fjordane fylkeskommune, Askedalen 2, 6863 Leikanger
