Kva gjer Stortinget?
Her finn du tre oppgåver, éi for kvar av hovudoppgåvene Stortinget har.
Oppgåve 1. Lover
Spør elevane om dei har nokre lover og reglar i klasserommet eller på skulen.
Oppgåve 2. Pengar
Spør elevane om dei veit kvar Noreg får pengane sine frå, om dei veit kva det vil seie å betale skatt og kva desse pengane går til.
Oppgåve 3. Følgje med og kontrollere
Har elevane forstått forskjellen på storting og regjering? Gjer gjerne eit poeng av at dei ikkje jobbar i same hus, då blir det lettare å forstå. Sjølv om ein ofte ser at statsministeren blir filma på Stortinget, så har ho/han ikkje kontor her.
LÆRARRETTLEIING TIL OPPGÅVENE
Inne i stortingsbygningen jobbar det i dag 169 stortingsrepresentantar. Dei er menn og kvinner som er valde av folket i Noreg, til å gjere nokre av dei viktigaste oppgåvene i landet vårt.
Stortingsrepresentantane har tre oppgåver som er spesielt viktige:
1. Stortingsrepresentantane bestemmer lovene i landet vårt. Det er dei som bestemmer om alle born skal få gå på skule, om det skal vere gratis å gå til tannlegen dersom ein har hol og at det ikkje er lov til å køyre for fort.
2. Alle må betale noko av løna si i skatt. Desse pengane går til ting som vi alle får glede eller nytte av, som politi, skular, sjukeheimar osv. Stortingsrepresentantane bestemmer kor mykje av desse pengane som skal brukast i det neste året og korleis pengane skal fordelast.
3. Stortingsrepresentantane kontrollerer regjeringa. Statsministeren er sjef for regjeringa. Å kontrollere vil seie å undersøkje eller å halde eit ekstra godt auge med noko. Når Stortinget har bestemt at regjeringa skal gjere noko, må dei også sjekke at det faktisk blir gjort. Kvar onsdag kjem derfor statsministeren eller nokon av dei andre ministarane som sit i regjering, til
Stortinget for å svare på spørsmål og forklare for Stortinget kva dei har tenkt å gjere med ulike saker.
