Resolusjon nr 4 2018.
Distrikta må sikrast ei tenleg postordning!
Samferdsleministeren har nyleg sendt ut på høyring eit framlegg om å redusere postomberinga til annankvar dag. Det er lett å sjå at dette vil føre til auka utarming av grunnlaget for heile posttenesta, som vil misse endå meir volum, og dermed må redusere endå meir. Vi er klår over at Posten har mista ein stor del av tidlegare volum, men her er endå store deler av landet der både næringslivet og innbyggarane elles er avhengige av at posten kjem fram så raskt som mogeleg.
Det er stor skilnad på å kutte postomberinga i distrikta og i sentrale strok. I dei tettbygde områda vil det vere fleire andre selskap enn Posten som vil vere
interesserte i å yte posttenester. I dei spreiddbygde områda er det særleg omsynet til distribusjon av medisin og papiraviser som krev ombering 5 dagar i veka. I mange område er det svært lang veg til post i butikk, og mange av dei eldre er avhengige av å få posten levert heim. Eit ekstra moment er at desse innsparingane også råkar dei distrikta som endå ikkje har, eller har dårleg internett-tilgang.
Ein bør ikkje akseptere at viktige velferdsgode vert gjorde om til inntektskjelder for statskassen, og deretter kutta ut når inntektene minkar. Det ser også ut til å vere dei same distrikta og dei same menneska som må betale prisen kvar gong.
Pensjonistforbundet Sogn og Fjordane meiner at menneska i heile landet må ha tilbod som sikrar gode levekår og livskvalitet, anten dei bur tett eller spreidd, anten dei er unge eller eldre.
Vi krev difor at alle område i landet får tenlege postordningar. Dei distrikta som er avhengige av Posten og ikkje har andre alternativ må sikrast postombering 5 dagar i veka.
Sendast til: Samferdsledept., Stortingsbenken, Pensjonistforbundet, NRK, Avisene i fylket.
