FYLKESMANNEN
I SOGN OG FJORDANE
SOGN OG FJORDANE
FYLKESKOMMUNE
Sakshandsamar: Haavard Stensvand Vår dato Vår referanse: Tore Eriksen
Telefon: 57 64 30 10 11.01.2013
E-post: fmsfhst@fylkesmannen.no Dykkar dato Dykkar referanse
Justis- og beredskapsdepartementet Postboks 8005 Dep,
0030 Oslo
Krav og forventningar i samband med utbygging av naudnett i Sogn og Fjordane
Utbygginga av naudnett i Sogn og Fjordane står no for døra. Vi har tru på at nettet vil vere eit viktig framsteg for naudetatane, og at det vil bidra til å gjere fylket enno tryggare.
Gjennom media har det gjentekne gonger vore reist spørsmål om dekninga i nettet.
Fylkesmannen og fylkeskommunen sendte den 29.09.2012 eit brev, der departementet m.a.
vart oppmoda om å stadfeste at det ikkje er planar om å redusere på kravet til dekning. Vi har ikkje fått svar på dette brevet.
Direktoratet for Nødkommunikasjon (DNK) har hatt møte med naudetatane, der m.a.
utandørsdekninga har vore tema. DNK har så langt synt vilje til å kome etatane sine krav og ønskje i møte. Det skal vere eit nytt møte i slutten av januar, og vi håpar at inntrykket av vilje vil verte stadfesta i dette møtet òg.
Naudnett er planlagt å skulle gi radiodekning langs riks- og fylkesvegar. Det er ei stor utfordring at ein stor del av dette vegnettet her i fylket går i tunnel. Med rundt 190 vegtunnelar, er Sogn og Fjordane eit av dei store tunnelfylka i landet.
Vi har forstått at det vil kome naudnett i dei tunnelane som har analogt radiosamband i dag. Ut over dette vil det berre verte dekning i tunnelar over 500 meter, og som har årsdøgntrafikk (ÅTD) på meir enn 5 000 køyretøy. Her i fylket er det rundt 95 tunnelar som er minst 500 meter, og så å seie alle har lågare ÅTD enn 5 000. I praksis vil det bety at mindre enn 1/3 av dei lange tunnelane i fylket vil få naudnett. Fleire av desse er mellom 6 000 og 7 500 meter. Vi meiner at dette ikkje er akseptabelt. Den vidare planlegginga av naudnettet må difor ha som mål at dekninga skal verte mykje betre enn dette.
Vi meiner at trafikktala ikkje kan vere avgjerande for om det skal installerast naudsamband eller ikkje i ein tunnel. Når ei ulykke først er ute, vil konsekvensen vere den same enten tunnelen har høg eller låg trafikk. Trafikktettleiken vil heller ikkje påverke redningsmannskapa sin trong for å kunne kommunisere på ulykkesstaden.
Ved ulykker i tunnel er det ein innarbeidd rutine at brannvesenet skal køyre inn i tunnelen, og klargjere den før dei andre redningsmannskapa køyrer inn. Ambulansepersonalet har instruks på at dei ikkje skal køyre inn i ein stengt tunnel før denne er sjekka ut av brannvesenet. Det vil vere vanskeleg å praktisere ein slik rutine dersom det ikkje er samband i tunnelen.
Statens vegvesen har ved gjentekne høve sagt at standarden på tunnelane i fylket er svært dårleg. Like før jul i fjor åtvara vegvesenet fylkestinget om problema. Det vart m.a. sagt at fleire
FYLKESMANNEN I SOGN OG FJORDANE SOGN OG FJORDANE FYLKESKOMMUNE av tunnelane er i så dårleg forfatning at det kan vere nødvendig å stenge dei, dersom det ikkje raskt vert gjort utbetringar. Manglande naudnett vil difor kunne gjere at tunnelar med dårleg infrastruktur (lys, tryggleiksutstyr, ventilasjon m.v.) vert enno dårlegare og mindre trygge.
Dei seinare åra har det skjedd ei sentralisering av dei akuttmedisinske helsetenestene i fylket.
Frå å vere eit fylke med 5 lokalsjukehus med akuttfunksjonar for 30 år sidan, er no alle slike tenester sentralisert til Førde sentralsjukehus. Ei god prehospital teneste, først og fremst representert ved ei god ambulanseteneste, er ein føresetnad for å kunne gjennomføre ei slik sentralisering på ein forsvarleg måte.
Ambulansemannskapa er avhengige av å kunne kommunisere med fagsentralen sin under transportar, for medisinsk rådgjeving, koordinering av møtekøyring m.v. Dersom den føreslåtte tunneldekninga vert realisert, vil det t.d. ved pasienttransport langs rv. 5 frå Sogndal til Førde vere umogleg å kommunisere via naudnett på store delar av den 10 mil lange etappen. Korkje i Frudalstunnelen (6,7 km), i Bergstunnelen (2,6 km) eller i Fjærlandstunnelen (6,4 km) er det planlagt dekning.
Endra tenesteordningar i både politiet og helsevesenet dei siste åra har gjort at vaktdistrikta er vorte større. Dette fører m.a. til at personell som er på vakt kan vere mykje på farten langs vegane, på veg til eller frå ulike oppdrag. Eit godt tunnelsamband vil gjere det lettare å kunne nå vaktpersonellet når dei er under oppdrag, men òg når nye oppdrag gjer det nødvendig å kalle opp tilgjengelege ressursar.
Dette brevet er utforma i samarbeid med Sogn og Fjordane politidistrikt, Helse Førde og KS Sogn og Fjordane, og gir uttrykk for eit felles syn.
Kopi til:
Direktoratet for nødkommunikasjon Politidirektoratet
Direktoratet for samfunnssikkerhet og beredskap Helsedirektoratet
Anne Karin Hamre Åshild Kjelsnes
Fylkesmann Fylkesordførar